English Text

SoetKaroo Wynlandgoed is ‘n dorpsplasie van een hektaar grond in die hoofstraat van Prince Albert. Die eienaars, Herman & Susan Perold, woon daar en maak dessertwyn van net hul eie druiwe.

Dit is inderdaad die eerste SAWIS-geregistreerde wynlandgoed in die Groot Karoo. En nee, dis nie die kleinste in Suid-Afrika nie!

Besoekers is welkom om die wingerd en die kelder te besigtig en die wyn te proe. Die SoetKaroo wyne word net vanaf die proelokaal van die kelder verkoop.

SoetKaroo Vineyards
Herman Perold
Die Wingerd

Grondontledings het bevestig dat die grond geskik is vir wingerdverbouing en dat geen aanvullings benodig word nie. Die Karoosomers is baie warm en droog, dus minimaal peste en plae - geen slakke nie, weinig swamsiektes en onkruid word uitgeskoffel. Vier kultivars wat goed aard in hierdie terroir, is in die jaar 2000 aangeplant,nl Rooi Muscat d'Alexandrie (Rooi Hanepoot), Rooi Muscat de Frontignan (Rooi Muskadel), Petit Verdot, en Touriga Nacional.

Herman is 'n uitsonderlik fisies-betrokke wingerdboer - sy perfeksionistiese benadering en harde werk word beloon deur die puik gehalte van die druiwe.

The Kelder

‘n Ou buitegebou is omskep in ‘n klein kelder waar die konsep ‘handgemaak’ baie letterlik vertolk word. Die operasie is vergelykbaar met die toetslaboratorium van ‘n groot wynkelder. Daar is egter alles wat benodig word om goeie kwaliteit te produseer. Die vlekvrye apparaat kom bv alles uit Italië waar daar ‘n groot aanvraag daarvoor is van die sg Garagiste - die erebenaming vir mense wat self klein hoeveelhede wyn maak, dikwels letterlik in hul garage. Die grootte van die bedryf maak dit moontlik om buitengewone – party sou dink neurotiese - kwaliteitsbeheer toe te pas van pluk tot by die finale verpakking.

Soetkaroo Kelder
Soetkaroo Wine
Die Wyn

Soetkaroo spesialiseer in gefortifiseerde dessertwyn. Elke druifsoort word eers volledig as ‘n aparte wyn gemaak, in ‘n klein vlekvrye tenk tyd gegee om karakter te ontwikkel en daarna of as enkelkultivar of as versnit gebottel.

Sowat die helfte van die oes is Hanepoot, maar die skaars rooi variant Rooi Muscat d’Alexandrie, met al die geure van die bekende geel druif, maar met ‘n besonderse ligroos kleur. Die donker druifsoorte Touriga Nacional en Petit Verdot word soms individueel as 100% kultivars gebottel, ander oesjare soos 2011 gekombineer vir ‘n ongewone, moontlik unieke versnit. Die aanvraag hiervoor oorskrei reeds die aanbod en kopers bespreek hul kwota vooruit.

En dan word ‘n baie klein oplaag SoetKaroo Reserve in ‘n spesiale karaf verpak, gevul met prima Rooi Muscat d’Alexandrie wat snertsies van die ander drie kultivars bevat.

2005 Michelangelo International Wine Awards
Die Oesjaar

Die Oesjaar 2012 is gekenmerk deur ‘n lang koel lente en vroeë somer, baie warm weer in Januarie, koeler Februarie, geen reën tydens die plukseisoen nie. Pluktyd het gestrek vanaf 8 Februarie tot 14 Maart. Die verrassing was die ongewoon hoë suiker van die Touriga Nacional wat gevolglik vanjaar berei is as ons eerste Cape Ruby in die styl van Portugese Port.

Dis ‘n wonderlike gevoel wanneer die oes volledig verwerk is en veilig geborge in tenk en vaatjie. Van nou af is Tyd die groot wynmaker. Die natuurlike geure van die druiwe kan stadig ontwikkel tot dit gereed is vir die bottel.

The Perolds
Kontak Ons

Tel : +27 23 541 1768
Fax : 086 524 3801
E-pos:perold@netactive.co.za
Webwerf: www.soetkaroo.co.za

Adres:
Kerkstraat 56
Prince Albert
6930
Suid-Afrika

SoetKaroo Logo